Son illərdə Azərbaycan xarici ölkələrlə iqtisadi və diplomatik əlaqələrini genişləndirmək istiqamətində fəal addımlar atır. Bu çərçivədə, Afrika qitəsində yerləşən Somali ilə əməkdaşlığın gücləndirilməsi diqqət mərkəzindədir. Fevral ayında Azərbaycan Prezidenti İlham Əliyev və Somali Prezidenti Hasan Şeyx Mahmud arasında keçirilən görüşlər nəticəsində iki ölkə arasında müxtəlif sahələrdə əməkdaşlıq müqavilələri imzalanıb. Bu razılaşmalar Azərbaycanın Somali iqtisadiyyatının bir sıra sektorlarına sərmayə qoymaq niyyətində olduğunu göstərir.

İmzalanan mühüm sənədlərdən biri “Azərbaycan Respublikasının Energetika Nazirliyi ilə Somali Federativ Respublikasının Energetika və Su Ehtiyatları Nazirliyi arasında yaşıl enerji sahəsində əməkdaşlıq haqqında Anlaşma Memorandumu”dur. Bu müqavilə, bərpa olunan enerji mənbələrinin inkişafı və alternativ enerji layihələrinin həyata keçirilməsi sahəsində hər iki ölkə arasında təcrübə mübadiləsini nəzərdə tutur. Somali günəş və külək enerjisi potensialına malikdir, bu da Azərbaycan üçün yeni sərmayə imkanları yarada bilər.

Azərbaycan və Somali arasında təhsil sahəsində əməkdaşlıq da gündəmdədir. “Azərbaycan Respublikasının Elm və Təhsil Nazirliyi ilə Somali Federativ Respublikasının Təhsil, Mədəniyyət və Ali Təhsil Nazirliyi arasında təhsil sahəsində əməkdaşlıq haqqında Saziş” iki ölkənin ali təhsil müəssisələri arasında birgə proqramların yaradılmasını və akademik mübadilələrin aparılmasını nəzərdə tutur. Bu əməkdaşlıq Somali gəncləri üçün yeni imkanlar açmaqla yanaşı, Azərbaycanın təhsil sahəsində beynəlxalq əlaqələrini gücləndirəcək.

            Azərbaycan Prezidenti İlham Əliyev ölkənin Somali iqtisadiyyatına sərmayə qoymaq üçün konkret layihələr üzərində işlədiyini bildirib. Bu layihələr arasında əsas diqqət infrastruktur və kənd təsərrüfatı sektorlarına yönəlib. Somalinin zəngin torpaq ehtiyatları və əlverişli iqlim şəraiti aqrar sahədə inkişaf üçün böyük potensiala malikdir. Eyni zamanda, ölkənin dəniz limanları və nəqliyyat infrastrukturunun yenilənməsi də Azərbaycanın investisiya maraqları arasındadır.

Somali Hind okeanı və Qırmızı dənizə çıxışı olan strateji yerləşməyə malikdir. Bu, ölkəni beynəlxalq ticarət və logistika mərkəzi kimi inkişaf etdirmək üçün əlverişli edir. Azərbaycan bu imkanlardan istifadə edərək Afrika bazarlarına çıxışını genişləndirə bilər. Eyni zamanda, Somali Azərbaycana yeni ticarət tərəfdaşı kimi böyük iqtisadi fayda verə bilər.

Azərbaycan və Somali arasında qurulan bu yeni iqtisadi əməkdaşlıq hər iki ölkəyə qarşılıqlı fayda gətirə bilər. Azərbaycanın yaşıl enerji, təhsil, infrastruktur və kənd təsərrüfatı sahələrinə sərmayə qoymaq planları Somalinin inkişafına töhfə verməklə yanaşı, ölkəmizin Afrika qitəsində iqtisadi mövqeyini gücləndirə bilər. Bu əlaqələr Azərbaycan üçün yeni bazarlara çıxış imkanı yaradır və beynəlxalq ticarət əlaqələrini daha da möhkəmləndirir.

Nərgiz Həsənova, YAP Bərdə rayon təşkilatı fəalı,

Bərdə rayon E.Əsədov adına Türkmən kənd tam orta məktəbin direktoru

Azərbaycan Respublikasının Əməkdar müəllimi